Eventos

A festa arrinca ás 18.00 horas no pavillón Arsenio Iglesias coa Orquestra 'Los Satélites' e o certame comezará ás 19.00, con 20 grupos e 19 propostas individuais ou de parella

O Entroido volve encher hoxe venres 20 de febreiro de música e fantasía Santa Cruz, en Oleiros, coa celebración da festa municipal no pavillón Arsenio Iglesias. A xornada comezará ás 18.00 horas coa actuación da Orquestra 'Los Satélites' e incluirá o tradicional concurso de disfraces, dotado con 5.200 euros en premios.

No certame participarán 20 grupos e 19 disfraces na modalidade individual ou de parella. Haberá presenza de participantes chegados de distintos puntos de Galicia, con inscricións procedentes, entre outros lugares, de Vilagarcía de Arousa, Vigo, Lugo, Cedeira, A Coruña, Betanzos, Vimianzo, Cambre, Culleredo, A Laracha ou Abadín, ademais de Oleiros.

O concurso arrancará ás 19.00 horas e repartirá premios en dúas categorías. Na modalidade de grupos entregarase un primeiro premio de 1.500 euros, un segundo de 1.000, dous terceiros de 500 e un accésit de 400. Para disfraces individuais e parellas haberá un primeiro premio de 400 euros, un segundo de 300, dous terceiros de 200 e dous accésit de 100 euros.