O Concello de Culleredo responde ao BNG pola solicitude de acceso a un expediente dun proceso selectivo
Culleredo vive un novo episodio de confrontación política entre o Concello e o BNG local, despois de que o grupo nacionalista solicitase acceso ao expediente completo dun proceso selectivo para cubrir unha praza de enxeñaría industrial, o que provocou unha resposta pública do goberno municipal.
Segundo expuxo o BNG, a formación levou ao pleno a petición de acceso íntegro á documentación administrativa do procedemento co obxectivo de comprobar se se respectaron os principios de igualdade, mérito e capacidade. As dúbidas xurdiron arredor dun proceso que inicialmente foi declarado deserto, posteriormente reactivado e no que se produciu un cambio na composición do tribunal cualificador.
Os nacionalistas tamén puxeron o foco na persoa proposta para ocupar a praza, ao sinalar a súa vinculación cunha empresa mencionada nun informe do Consello de Contas de Galicia, así como na existencia dun voto particular do secretario municipal dentro do procedemento, cuestións que, ao seu xuízo, deberían ser aclaradas para disipar calquera sombra de dúbida.
Fronte a estas afirmacións, o Concello de Culleredo emitiu un comunicado no que desmente as acusacións do BNG e aclara que a solicitude de acceso ao expediente non foi denegada polo goberno municipal. Segundo explica, a resolución corresponde exclusivamente á Secretaría municipal, que exerce tamén como Secretaría do tribunal do proceso selectivo, no marco das súas competencias técnicas e administrativas.
Desde o goberno local acúsase ao portavoz nacionalista de tergiversar os feitos cun ‘desmedido interese electoralista’ e ínstaselle a rectificar unhas declaracións que cualifican de falsas. O executivo municipal subliña que se trata dun ditame puramente xurídico e administrativo, alleo a calquera decisión política do goberno.
No mesmo comunicado, o Concello critica o que considera unha actitude hipócrita do BNG, ao recorrer aos informes e criterios da Secretaría e da Intervención municipal só cando lle resultan favorables. Neste sentido, lembra que os ditames dos habilitados nacionais deben ser respectados pola corporación en todos os casos.
O goberno local tamén recorda que non é a primeira vez que o BNG tenta poñer en dúbida procesos selectivos por motivacións políticas. De feito, menciona a denuncia presentada no seu día pola selección de policías locais ante o Consello Consultivo, que acabou dando a razón ao Concello, aínda que a actuación do BNG provocou o atraso dun ano na incorporación do persoal.
Os procesos de selección, insiste o Concello, son realizados por tribunais independentes, constituídos conforme á lexislación vixente, polo que cuestionar a súa honorabilidade resulta ‘vergoñento e impropio dun membro dunha corporación local’.
No caso concreto da praza de enxeñaría industrial, o Concello explica que foi preciso contactar co Colexio de Enxeñeiros e con numerosas administracións públicas para completar o tribunal, xa que se esixía unha especialidade moi concreta e a condición de persoal funcionario. Estes requisitos dificultaron a súa composición, aínda que finalmente se conseguiu con membros procedentes de distintos puntos de Galicia.
O goberno municipal remata convidando ao portavoz do BNG a actuar con rigor e seriedade e a evitar a difusión de bulos sobre o funcionamento dos órganos da administración pública, advertindo de que este tipo de mensaxes danan a confianza no sistema democrático.