O Concello de Sada recibiu unha obra inédita de Isaac Díaz Pardo para o seu patrimonio cultural
O Concello de Sada celebrou o Día das Artes Galegas 2025, cunha importante incorporación ao seu patrimonio cultural: unha obra inédita de Isaac Díaz Pardo. O agasallo foi entregado pola Asociación Cultural Irmáns Suárez Picallo e trátase dunha xilografía realizada polo mestre galego en 1964, durante unha das súas estancias en Buenos Aires.
A peza foi custodiada durante décadas pola familia de Luis Carlos Ángel "Pocholo" Sánchez, quen traballou na fábrica Celtia e nas Porcelanas de Magdalena. O Concello de Sada, en sinal de gratitude, anunciou que a obra será exposta na Casa da Cultura Pintor Lloréns unha vez estea debidamente enmarcada e protexida. Mentres tanto, puxo a disposición do público unha copia dixitalizada e unha carta detallando a traxectoria da obra, así como unha ligazón a un vídeo que afonda na súa historia.
Ademais, o Concello de Sada colaborará activamente coa Asociación Suárez Picallo e a Asociación de Magdalena na produción dun documental sobre Isaac Díaz Pardo. O proxecto audiovisual atópase en fase de elaboración e prevese a súa estrea antes da chegada do verán.