O Concello de Paderne expresa a súa preocupación polo risco de peche das escolas unitarias
O Concello de Paderne manifestou a súa preocupación ante a posible clausura das escolas unitarias do municipio debido á baixa matriculación para o vindeiro curso escolar. O alcalde, Sergio Platas, alertou sobre a "ameaza" que supón esta situación para a continuidade dos centros de Infantil da localidade.
"Precisamos nenos e nenas", subliñou Platas, quen destacou que as escolas unitarias ofrecen "unha ensinanza personalizada" e constitúuen "un auténtico luxo" para as familias. Ademais, lembrou que o Concello ofrece un servizo de madrugadores gratuíto nestes centros públicos dependentes da Xunta de Galicia, co obxectivo de facilitar a conciliación familiar. "Este servizo permite que os pais e nais leven aos seus fillos antes á escola para poder ir traballar, ademais de ofrecerlles a posibilidade de almorzar alí", explicou o rexedor.
Para fortalecer a oferta educativa e fomentar a matriculación, o Concello anunciou que duplicará o servizo de madrugadores e estenderao á Escola de Viñas no próximo curso escolar. Esta iniciativa enmárcase dentro dun plan global de mellora educativa, que incluíe a recente remodelación dos centros de Viñas e Areas. As obras, cun investimento de preto de 100.000 euros financiados con fondos municipais, permitiron mellorar infraestruturas e parques infantís, ofrecendo un espazo máis moderno e seguro para o alumnado.
A estratexia municipal de apoio ás unitarias concrétase no plan 'Educa en Paderne, educa na casa', co que o Concello busca incentivar a matriculación a través de xornadas de portas abertas, faladoiros entre pais e nais e a difusión de vídeos promocionais nas redes sociais.
"A educación que se ofrece é de moita calidade, porque cada profesora atende a un número reducido de alumnos e alumnas", indicou o alcalde, que alertou de que actualmente o límite mínimo de seis matriculados supón un reto para a continuidade das escolas unitarias. O rexedor agarda que nos próximos días se produza un aumento na inscrición que permita garantir a permanencia destes centros educativos fundamentais para a comunidade.