Cultura

O Pavillón de Dordaño acollerá unha celebración para pequenos e maiores con concurso de disfraces

O Concello de Oza-Cesuras convida a toda a veciñanza a celebrar o Entroido cunha gran festa chea de cor, música e diversión. O evento terá lugar o martes 4 de marzo no Pavillón de Dordaño, onde pequenos e maiores poderán gozar dunha tarde inesquecible.

A festa de Entroido comezará ás 17.00 horas e prolongarase ata as 20.00 horas, ofrecendo unha ampla variedade de actividades para todas as idades. Haberá música, inchables, merenda e moitas sorpresas que converterán esta xornada nunha das máis especiais do ano.

Un dos momentos máis agardados será o tradicional concurso de disfraces, no que tanto os máis pequenos como os adultos terán a oportunidade de amosar a súa creatividade e orixinalidade. Os mellores disfraces serán premiados, engadindo así un aliciente extra á festa. Desde o Concello de Oza-Cesuras animan a toda a cidadanía a participar e vivir un Entroido cheo de alegría e bo ambiente.