O Concello de Oleiros preserva o uso comercial nos baixos dos seus núcleos urbanos
O Concello de Oleiros reafirma o seu compromiso cun urbanismo equilibrado e sostible ao preservar o uso comercial e empresarial dos baixos situados nas zonas máis densamente poboadas do municipio. Con esta medida, preténdese garantir unha combinación harmónica entre actividade económica e uso residencial, mantendo a estrutura urbana e asegurando que a veciñanza teña acceso a servizos esenciais preto dos seus fogares.
A normativa recentemente publicada polo Concello define as zonas nas que se poderá reconverter espazos comerciais en residenciais, excluíndo desta posibilidade os ámbitos máis urbanizados, onde se considera que existe potencial para a actividade comercial. Os zócalos urbanos que orixinariamente foron concebidos para albergar establecementos comerciais seguirán reservados para tal uso, evitando que a conversión masiva en vivendas poida xerar unha perda de servizos e un incremento dos prezos dos locais.
A decisión do Concello responde á necesidade de equilibrar o crecemento residencial coa conservación do comercio e das actividades profesionais, garantindo que o municipio continúe a ser un espazo habitable e economicamente activo. A preservación das zonas comerciais busca evitar que amplas áreas do municipio queden sen acceso a servizos básicos, especialmente nun contexto de forte presión sobre o mercado inmobiliario debido ao auxe do turismo e do alugueiro de curta duración.
Segundo recolle o informe municipal que fundamenta a medida, “un urbanismo equilibrado e sostible require garantir un acceso digno á vivenda sen comprometer a actividade comercial, asegurando que as zonas urbanas sigan sendo espazos vivos e economicamente resilientes”.
O decreto publicado no portal web municipal especifica as áreas que non poderán ser transformadas completamente en residenciais. Estas inclúen os núcleos urbanos de Mera, Oleiros, Perillo, Santa Cruz, Rialta e todo o eixo económico conformado pola antiga N6, unha zona tradicionalmente comercial que aproveita a importancia da Avenida das Mariñas como arteria viaria metropolitana.
Esta medida urbanística vén complementar a recente prohibición das vivendas turísticas en todo o territorio municipal, unha decisión adoptada para preservar a cohesión social e manter a función residencial dos núcleos poboacionais. O obxectivo é que as pernoctacións efémeras se concentren en hoteis e establecementos regulados, evitando o impacto negativo que a proliferación das vivendas turísticas ten noutros municipios.
O modelo urbano tradicional galego, baseado na integración coa natureza e na proximidade aos servizos, conta cun gran respaldo social. Segundo a enquisa realizada en febreiro de 2025, o 85 % das 2.994 persoas que participaron expresaron o seu apoio ao urbanismo promovido polo Concello de Oleiros, avalando as políticas municipais encamiñadas a garantir un equilibrio entre vivenda, comercio e calidade de vida.