O Concello de Miño organiza unha saída ao Ecoparque de Marín para a mocidade
O Concello de Miño segue apostando polo ocio activo para a xente moza a través do programa Xuventude EnCaMiño. Nesta ocasión, organízase unha saída ao Ecoparque de Marín, un espazo de aventura en plena natureza que ofrece diversas actividades multiaventura para promover o deporte, a convivencia e a diversión ao aire libre.
A actividade vai dirixida a mozos e mozas de entre 12 e 17 anos e terá lugar o próximo 22 de marzo. A saída está programada para as 08.00 horas, e o regreso será ás 15.00 horas. O custo da inscrición é de 8 euros, e as persoas interesadas poden formalizala no rexistro do Concello de Miño.
O Ecoparque de Marín é un espazo único que ofrece diversas actividades como tirolinas, pontes colgantes e circuítos de equilibrio, garantindo unha xornada emocionante e segura para todos os participantes. Con esta iniciativa, o Concello de Miño reitera o seu compromiso coa promoción de actividades que fomenten un estilo de vida saudable, a conexión coa natureza e a participación da mocidade.
Para obter máis información e inscribirse, as persoas interesadas poden contactar no teléfono 604 004 439 ou no correo electrónico cultura.deportes@concellodemino.gal.