O Concello de Curtis presenta o 25N con unha programación que combina prevención, formación e apoio ás vítimas
O Concello de Curtis presentou na Casa Museo de María Antonia Dans o programa municipal polo 25 de novembro, Día Internacional da Eliminación da Violencia contra a Muller. No acto interviñeron o alcalde, Javier Francisco Caínzos Vázquez; a concelleira de Igualdade, Eva Lata, quen leu o manifesto institucional; e a directora do Centro de Información á Muller (CIM), Natalia Pita. Tamén asistiu o director xeral de Loita contra a Violencia de Xénero da Xunta de Galicia, Roberto Barba Alvedro, que salientou a cooperación entre administracións para mellorar a atención ás vítimas e reforzar a prevención.
A programación, dirixida ao conxunto da cidadanía, inclúe obradoiros de defensa persoal feminina, autoestima e arteterapia; actividades de bo trato e igualdade nos centros educativos, ademais do scape room 'Operación Radar'; e sesións no Centro Penitenciario de Teixeiro centradas na educación emocional e o respecto. Compleméntase cunha campaña de sensibilización en redes sociais, cartelería e reparto de material informativo, así como coa reunión da Mesa sectorial contra a violencia de xénero para actualizar os protocolos de coordinación entre servizos sociais, sanitarios e educativos.
Durante a lectura do manifesto, Eva Lata subliñou que 'a loita contra a violencia machista é unha tarefa de todas e todos, e require compromiso, educación e unidade social'. Pola súa parte, o alcalde Javier Caínzos reafirmou 'o compromiso do Concello coa igualdade real e coa protección das vítimas, porque non hai xustiza nin convivencia posible mentres exista a violencia de xénero'. A directora do CIM, Natalia Pita, agradeceu a implicación das entidades colaboradoras e lembrou que o servizo municipal ofrece atención psicolóxica, xurídica e social gratuíta para todas as mulleres que o precisen. O Concello anima á veciñanza a participar e a manter viva durante todo o ano a mensaxe do 25N: 'Por unha vida libre de violencias, en igualdade e con respecto'.