O Concello de Curtis aborda hoxe en pleno a nova ordenanza de residuos
O pleno do Concello de Curtis tratará hoxe a proposta de aprobación provisional da nova Ordenanza Reguladora do Servizo de Recollida de Residuos de Competencia Municipal. Esta medida pretende adaptar a xestión dos residuos municipais á Lei 7/2022, do 8 de abril, sobre residuos e solos contaminados para unha economía circular, substituíndo as normativas actualmente vixentes, datadas de 2013 e 2008.
O novo regulamento establece importantes cambios para modernizar a recollida e xestión dos residuos. Entre as medidas previstas atópase a introdución de sistemas máis eficaces de segregación e recollida selectiva que inclúan fraccións como envases lixeiros, vidro, papel e cartón, orgánicos e fracción resto. Ademais, propón a implantación dun servizo porta a porta destinado a grandes produtores, como establecementos comerciais e de hostalería, para a recollida de papel e cartón.
Tamén se regula a xestión de residuos voluminosos e especiais, como enseres e vehículos abandonados, e foméntase o uso do punto limpo. Por outra banda, o texto reforza o réxime sancionador, incrementando as multas coercitivas para combater vertidos incontrolados e outras prácticas que prexudiquen o medio ambiente. O documento tamén prevé mecanismos de financiamento a través de taxas municipais e promove a reutilización de bens en bo estado recollidos no punto limpo.
Se a proposta se aproba hoxe de forma provisional, a ordenanza quedará exposta ao público durante 30 días hábiles para a presentación de reclamacións. De non recibir obxeccións, o texto considerarase aprobado definitivamente. Con esta iniciativa, o Concello de Curtis avanza cara á modernización da xestión de residuos, reforzando o seu compromiso coa sustentabilidade e a economía circular.