O Concello de Culleredo insta á Xunta a mellorar o mantemento dos ríos do municipio
O Concello de Culleredo reclama á Xunta de Galicia que actúe nos ríos do municipio, que segundo traslada, presentan en moitos puntos un notable deterioro debido á falta de mantemento por parte da administración autonómica. O concelleiro de Medio Ambiente, Carlos Liñares, sinalou que o plan que recentemente promocionou a Xunta esqueceu, por agora, a Culleredo.
O Goberno local insta á Xunta a activar este plan nos cursos fluviais do municipio, dada a súa preocupante situación. En concreto, o río Valiñas e os seus afluentes carecen de restauración fluvial e levan anos sen ser limpos, acumulando árbores caídas e obstáculos que dificultan o fluxo natural da auga. Ademais, non se ten realizado unha limpeza axeitada das marxes nin un control das especies exóticas invasoras, o que pon en risco a súa integridade ecolóxica e os servizos ecosistémicos que proporcionan.
Esta situación é especialmente visible en moitos tramos da rede fluvial, como no parque empresarial de Alvedro, onde a maleza dificulta ata a visibilidade do curso da auga.
O Goberno municipal lamenta que o PP de Culleredo negue a necesidade destas actuacións por "interese partidista". "Resulta curioso que ao partido político que goberna na Xunta lle dea igual o mal estado de conservación dun dos nosos mellores recursos medioambientais", indicou Liñares, quen considera que desde a corporación "debemos loitar por investimentos, non bloquealas", en referencia ao PP.
O concelleiro advertiu de que en certas zonas os cauces son "intransitables" e subliñou que o obxectivo é mellorar o seu estado de conservación para que poidan ser desfrutados pola veciñanza. "Requirimos a eliminación, modificación ou xestión de todas as presións que alteran o curso do río e o desvían do seu estado orixinal para evitar a súa continua degradación", concluíu.