O Concello de Culleredo impulsa a recuperación de A Garrocha como espazo deportivo e cultural
O Concello de Culleredo avanza na recuperación do recinto de A Garrocha para uso veciñal, cun novo contrato para unha consultoría técnica que redactará un plan director. Este estudo avaliará a viabilidade e definirá a folla de ruta para a creación dun complexo deportivo e cultural na zona situada entre Tarrío e Orro, á saída da Terceira Ronda.
Segundo o alcalde, José Ramón Rioboo, o obxectivo é aproveitar as instalacións “para ampliar a oferta de espazos deportivos e culturais” e fomentar novas modalidades e eventos que resulten atractivos para a cidadanía. Rioboo destaca que A Garrocha atópase nun “punto neurálxico” con boas conexións para achegar a programación especialmente ás parroquias rurais.
A proposta do Goberno local pasa por converter o antigo picadeiro nun centro polivalente e modular, adaptable a diferentes tipos de eventos deportivos, culturais ou sociais. “Apostamos por xerar un espazo moderno, funcional e adaptable aos diferentes requisitos dos eventos para así ter unha maior capacidade para celebralos”, sinala o rexedor.
O complexo poderá acoller un módulo principal con capacidade para até 1.000 espectadores, con configuracións variables segundo se trate dunha competición deportiva ou dun espectáculo cultural. “Queremos un espazo polivalente no rural para programar actos de envergadura e a cuberto”, afirma Rioboo.
Outro aspecto fundamental para o Concello é que o recinto conte cunha ampla zona de aparcadoiro, dado que se prevé que o vehículo sexa o medio máis habitual para acceder a A Garrocha.
Ademais do módulo principal, o Concello aspira a incorporar novos terreos de xogo para distintas disciplinas deportivas, aínda que será o estudo técnico quen determine as opcións máis viables.
O plan director tamén incluirá unha proposta arquitectónica con planos e unha valoración económica das obras e posta en marcha do complexo. A asistencia técnica deberá deseñar un plan de actuación por fases para permitir un desenvolvemento gradual en función dos recursos financeiros dispoñibles.
É importante lembrar que A Garrocha albergou no seu día un centro hípico concesionado, pero tras incumprimentos, o Concello iniciou en 2018 os trámites para a recuperación do espazo, que desembocaron nun longo proceso xudicial e administrativo ata a reversión ao Concello. As instalacións sufriron actos vandálicos, pero a estrutura e cuberta manteñense en bo estado, segundo os técnicos municipais.