O Concello de Culleredo colaborará con Aclad en campañas de sensibilización sobre adiccións
O Concello de Culleredo anuncia que traballará xunto coa Asociación Cidadá de Loita Contra a Droga (Aclad) en campañas de prevención e sensibilización social sobre as adiccións. Así o confirmou o alcalde de Culleredo, José Ramón Rioboo, durante a súa visita á comunidade terapéutica que Aclad xestiona en A Zapateira.
O rexedor, acompañado pola concelleira de Cohesión Social, Marta Figueroa, coñeceu de primeira man o labor que realiza a entidade nas súas instalacións e puxo en valor a relevancia dos programas de prevención e concienciación que Aclad desenvolve ao longo do ano.
Na visita estiveron presentes a presidenta de Aclad, Rosa Barreiro, e a psicóloga clínica Ana González López, quen alertaron do incremento de persoas cada vez máis novas nos seus programas, especialmente no rango de idade entre os 18 e os 25 anos, así como do aumento dos trastornos mentais graves derivados do consumo de drogas.
José Ramón Rioboo agradeceu a importante labor que desempeña Aclad no municipio, onde se atopa a sede da súa comunidade terapéutica, e subliñou a necesidade de reforzar os programas informativos destinados á poboación máis vulnerable, co desexo expreso de colaborar para abordar esta problemática.