O Concello de Culleredo activa os ‘Consellos Sectoriais’ para fomentar a participación cidadá
O Concello de Culleredo pon en marcha os ‘Consellos Sectoriais’, uns foros destinados a facilitar a participación cidadá e a mellorar a comunicación entre as asociacións veciñais e a administración local. Estes órganos terán un carácter informativo, de control e de proposta, permitindo canalizar as inquedanzas e necesidades da veciñanza.
Os Consellos estarán formados por representantes das asociacións inscritas no rexistro municipal, así como polos grupos políticos con representación na corporación. Para garantir unha participación ampla, o Concello está a contactar con todas as asociacións para que designen a súa persoa representante. No caso de non ter recibido a comunicación, as entidades poden escribir ao correo participa@culleredo.es nun prazo máximo de 10 días para achegar os datos do seu representante e formar parte da iniciativa.
Establécense dous Consellos Sectoriais, organizados segundo a súa área de actuación:
- Consello Sectorial de Política Social, Mocidade, Deporte, Desenvolvemento Local, Cultura, Festas, Turismo, Urbanismo e Medio Ambiente.
- Consello Sectorial de Facenda, Patrimonio, Administración Electrónica, Participación Cidadá, Educación, Medio Rural, Obras, Servizos e Seguridade Cidadá.
Con esta iniciativa, o Concello de Culleredo busca crear un espazo no que as asociacións poidan solicitar información, formular propostas conxuntas e impulsar políticas do seu interese.