O Concello de Coirós realiza unha proba piloto do seu novo punto limpo
A posta en marcha definitiva do novo punto limpo de Coirós avanza, xa que o Concello está a realizar unha proba piloto. Así, o colector de residuos xa está instalado diante do Local Social de Queirís. Os veciños e veciños da zona poden depositar nel os residuos domésticos que non se eliminan a través dos colectores ordinarios, como pilas, electrodomésticos, tóners e cartuchos de impresión, envases de pintura e vernices, aerosois e xoguetes.
Nestes momentos, o Concello de Coirós está a determinar os lugares e datas máis convenientes para a colocación do punto limpo nas distintas parroquias do concello ao longo do ano. A proba que se realiza en Queirís servirá para ultimar detalles sobre o terreo.
O colector é a parte de recollida e almacenaxe do punto limpo móbil, que está integrado por un camión de propulsión eléctrica para desprazalo. O concelleiro de Medio Ambiente, Jorge Boado, comentou que se trata dunha iniciativa municipal que busca reducir o impacto dos residuos na natureza. “Son iniciativas nas que os veciños de Coirós sempre se involucran de cheo”, apuntou.
O concelleiro tamén lembrou que ademais deste novo servizo, o de recollida de enseres domésticos voluminosos seguirá a realizarse o último venres de cada mes. Para poder desprenderse destes residuos só é necesario solicitalo por teléfono ao concello, e indicarase o lugar e a hora onde debe depositarse para o seu tratamento nun xestor autorizado.