O Concello de Coirós incorpora un novo vehículo para os Servizos Sociais
Coirós conta desde este mediodía cun novo vehículo asignado á concellería de Servizos Sociais. Trátase dun Dacia Sandero Stepway, que será utilizado para os desprazamentos ás vivendas dos usuarios de axuda no fogar e outras asistencias sociais.
A adquisición do vehículo supuxo un investimento total de 18.131,17 euros, asumido integramente pola Deputación da Coruña. O novo coche conta con etiqueta cero e pode funcionar tanto con gasolina como con gas licuado de petróleo, contribuíndo así á sustentabilidade ambiental.
O alcalde de Coirós, Francisco Quintela, quixo agradecer publicamente á Deputación da Coruña o seu continuo apoio aos pequenos municipios, destacando a importancia desta nova incorporación para mellorar a atención social no concello.