O Concello de Coirós denuncia unha vertedura incontrolada de residuos en Collantres
O Concello de Coirós presentou unha denuncia ante a Garda Civil de Betanzos tras detectar unha vertedura incontrolada de residuos domésticos nas inmediacións dos colectores situados no acceso á igrexa e ao lugar de Collantres. Segundo trasladaron varios veciños aos responsables municipais, durante a fin de semana unha persoa descoñecida deixou no punto unha serie de obxectos fóra dos contedores, entre eles unha barbacoa metálica, xoguetes, plásticos, teas metálicas e restos de madeira dun moble.
A denuncia foi formalizada co obxectivo de identificar o autor ou autores da infracción e iniciar, se procede, o correspondente expediente sancionador. O alcalde de Coirós, Francisco Quintela, condenou este tipo de actos que, segundo advertiu, "prexudican a todos os veciños e deterioran o medio natural que é responsabilidade de todos protexer".
Quintela lembrou que o concello conta cun servizo gratuíto de recollida de enseres, ao que poden acceder as persoas empadroadas simplemente contactando co consistorio para que se lles indique o día e lugar axeitado para a entrega. Un camión municipal encárgase de trasladar os materiais ao xestor autorizado segundo a súa natureza.
Ademais, o rexedor puxo en valor o punto limpo móbil que opera desde hai uns meses, cubrindo periodicamente todas as parroquias do municipio. Neste servizo pódense depositar residuos especiais como pinturas, xoguetes, pilas, tóners e outros produtos que non deben acabar nos colectores convencionais.
Desde o Goberno local tamén se quixo agradecer expresamente á Garda Civil de Betanzos o seu traballo en prol do coidado do medio ambiente, destacando a súa eficacia na resolución deste tipo de casos e na identificación dos responsables.