A feira de Carral do 4 de setembro queda suspendida pola coincidencia coas Festas do Socorro

A tradicional feira non se celebrará ese día para garantir a seguridade e o correcto desenvolvemento da Festa da Empanada e da programación patronal

Fotografía da edición anterior

O Concello de Carral anunciou a suspensión da feira municipal do xoves 4 de setembro no Campo da Feira debido á coincidencia coa apertura das Festas do Socorro 2025, que se prolongarán ata o día 8.

Segundo explicou o goberno local, a instalación das atraccións e dos postos propios das festas fai imposible a colocación habitual das tendas de alimentación, roupa e outros artigos que forman parte da feira, polo que se optou por non celebrala nesta ocasión.

A medida afecta unicamente a esa xornada e responde á necesidade de garantir a seguridade, a accesibilidade e o bo funcionamento tanto da feira como das actividades patronais, entre as que destaca a Festa da Empanada, programada para o mesmo 4 de setembro.

As Festas do Socorro incluirán tamén citas tradicionais como o desfile de carrilanas, as verbenas con orquestras e grupos musicais de renome, así como a queima do panteón, que pechará a celebración o luns 8 de setembro.

A feira municipal retomarase con normalidade a partir da seguinte convocatoria, unha vez finalizados os festexos.