O Concello de Carral lembra a obrigatoriedade da xestión da biomasa para previr incendios
O Concello de Carral informa ás persoas propietarias de terreos que o prazo para cumprir coa xestión da biomasa remata o 31 de maio. Esta medida é fundamental para reducir o risco de incendios forestais e afecta ás parcelas situadas preto de zonas urbanas, edificacións illadas e infraestruturas sensibles.
A normativa establece a creación dunha franxa de protección de 50 metros na que é necesario manter limpas as parcelas e eliminar especies de alto risco como eucaliptos, piñeiros, acacias ou toxos. O obxectivo é minimizar a propagación do lume en caso de incendio e garantir a seguridade das persoas e bens.
En caso de incumprimento, o Concello poderá levar a cabo os traballos de limpeza a cargo da persoa responsable, ademais de impoñer sancións económicas que poden ir desde os 1.000 ata os 100.000 euros.
O goberno local fai un chamamento á responsabilidade da veciñanza para que realice as tarefas de limpeza dentro do prazo establecido e contribúa á prevención de incendios no municipio. Para máis información, as persoas interesadas poden contactar co Concello.