O Concello de Carral inaugura a nova edición de Tapeando Carral con 11 locais participantes
Tapeando Carral comezou este venres unha nova edición, unha cita consolidada no municipio que este ano conta coa participación de 11 establecementos hostaleiros do núcleo urbano e das parroquias de Tabeaio, Sergude, Cañás e Beira.
O certame estenderase ata o luns 8 de decembro, cun horario de degustación que será de 12:30 a 15:30 horas e de 20:00 a 23:00 horas, agás o luns, cando as tapas deixarán de servirse ás 15:00 horas.
A xornada inaugural estivo marcada pola gran afluencia de público nos bares, restaurantes e tabernas adheridas á campaña, que se mostraron cheos de clientes desexosos de probar as especialidades preparadas para esta edición. Entre os participantes atópanse Boca Grande, Bar Tropezón, Casa Adolfo, Do Pincho Panadería & Docería, Vinoteca Taberna XXI, Restaurante Terra, Taberna Lume e Ferro, Casa Roel, O’ Lareiras, A Parola e Costa da Égoa.
As propostas gastronómicas son variadas e para todos os gustos, destacando receitas con costela, polbo, callos e albóndigas, entre outras.
Unha edición que, sinalan desde o Concello, “está a ser todo un éxito”, a pesar do mal tempo. Tapeando Carral leva varios anos funcionando como antesala á programación de Nadal, co obxectivo de impulsar o consumo na hostalería e poñer en valor os establecementos locais.