O Concello de Carral e A Xunta avalían as necesidades da atención sanitaria no municipio
O Concello de Carral está a avaliar coa Xunta de Galicia as necesidades actuais e futuras da atención sanitaria no municipio. O alcalde, José Luis Fernández Mouriño, mantivo esta semana unha reunión de traballo co conselleiro de Sanidade, Antonio Gómez Caamaño, na que se analizaron distintas opcións para mellorar as infraestruturas de atención primaria.
No encontro tamén participaron o xerente da área sanitaria da Coruña e Cee, Luis Verde, a directora xeral de Recursos Económicos do Servizo Galego de Saúde, Amparo Pousada, así como a concelleira de Sanidade, Cristina Casal, e o edil Francisco Bello.
Entre as alternativas postas sobre a mesa figura a posibilidade de construír un novo centro médico a curto ou medio prazo nas inmediacións do actual. Ademais, quedou apalabrada unha próxima visita de persoal técnico da Consellería ao municipio para analizar en detalle as necesidades do centro de saúde, tanto inmediatas como a medio prazo.
Mentres non se produce esa visita, ambas partes coincidiron na importancia de manter en bo estado as instalacións existentes. Durante a reunión abordáronse problemas como as humidades, a sensación térmica no interior do edificio ou a necesidade de renovar as ventás, entre outras actuacións urxentes.
O alcalde agradeceu a boa disposición do conselleiro, quen se mostrou interesado 'polas nosas demandas, entendendo que un concello como Carral, en pleno crecemento, precisa de melloras nas infraestruturas de atención primaria que permitan ofrecer a mellor asistencia aos veciños e veciñas'.
Fernández Mouriño subliñou que a mellora dos servizos públicos é 'unha das nosas liñas de traballo prioritarias'. Neste senso, lembrou que Carral superou xa os 7.000 habitantes tras un notable incremento demográfico nos últimos anos, ao que se suma a chegada de novas familias logo do remate de edificios inacabados da Sareb. 'Este crecemento ten que ir da man de máis e mellores servizos para a veciñanza, tanto sanitarios como educativos', apuntou.
O rexedor destacou tamén a colaboración da Xunta, que permitirá avanzar noutras melloras de infraestruturas, como a ampliación do CEIP Vicente Otero Valcárcel e actuacións na escola infantil do municipio.