O Concello de Betanzos recolle máis de oito toneladas de lixo en Os Caneiros tras a primeira xira
O dispositivo municipal de limpeza retirou máis de oito toneladas de refugallos en Os Caneiros despois da primeira xira campestre, celebrada o 18 de agosto. A elevada afluencia de participantes fixo que se incrementase a cantidade de residuos respecto a edicións anteriores, destacando sobre todo botellas de plástico, bolsas, caixas e cartóns.
Os labores estendéronse ademais ao camiño de Xan Xiao, desde Os Anxos, e ao propio leito do río, co obxectivo de deixar o espazo en condicións óptimas para a segunda romaría, prevista para o 25 de agosto, na que se espera unha asistencia algo menor.
Xunto ás tarefas de limpeza, o Concello puxo en marcha o mesmo operativo de seguridade que na primeira xira, integrado por máis dun centenar de persoas pertencentes a Protección Civil, Garda Civil, Policía Local e Cruz Vermella. Así mesmo, volverán editarse folletos informativos con recomendacións para garantir unha festa segura e respectuosa co entorno.