O Concello de Bergondo comeza as obras dunha senda peonil en O Casal
O Concello de Bergondo traslada que xa están en marcha as obras de creación dunha senda peonil na zona de O Casal, na parroquia de Santa Marta de Babío. Este proxecto, que o goberno local sacou a concurso a finais do ano pasado, ten como obxectivo a creación dun itinerario de aproximadamente 800 metros de lonxitude, que se estenderá desde a intersección coa AC-170 ata o cruce coa AC-164.
O propósito principal das obras é mellorar a circulación peonil pola zona, garantindo unha maior seguridade para as persoas que transiten por alí. A nova senda peonil estará separada da calzada por elementos físicos, e ademais, os traballos aproveitan a ocasión para ampliar a rede de alumbrado público na zona, especialmente na área do paso de peóns xa existente, onde se prevé a instalación de dúas novas farolas adicionais.
Este proxecto, cun orzamento de 66.282,07 euros, forma parte do compromiso do goberno local de mellorar as infraestruturas e os espazos públicos en todas as parroquias do municipio. Trátase do proxecto gañador dos Orzamentos Participativos de 2023, aínda que foi modificado para adaptarse ás autorizacións sectoriais necesarias para a súa execución.