O Concello de Bergondo activa o seu programa de conciliación na Semana Santa
Un ano máis, o Concello de Bergondo pon en marcha o seu programa de conciliación durante a Semana Santa, unha iniciativa dirixida a facilitar a compatibilidade da vida laboral e familiar das familias traballadoras do municipio.
O programa está destinado a nenas e nenos de entre 3 e 16 anos empadroados en Bergondo e desenvolverase os días 14, 15, 16 e 21 de abril, en horario de 08:00 a 15:00 horas. Durante estas xornadas, os participantes poderán gozar de actividades deportivas, manualidades, educación dixital, teatro, saúde, sensibilización en igualdade, primeiros auxilios e reforzo educativo, entre outras propostas.
O custo da actividade é de 5 euros por día, con descontos dispoñibles para familias numerosas, persoas inscritas no Programa de Voluntariado dos Servizos Sociais Municipais e situacións de vulnerabilidade segundo valoración da Área de Benestar Social.
As inscricións están abertas dende hoxe, 2 de abril, ata o 7 de abril e poden realizarse a través do correo electrónico educacion@bergondo.gal, da sede electrónica municipal ou de maneira presencial na Casa da Cultura en horario de 09.30 a 14.30 horas.
O 8 de abril publicarase a lista provisional de participantes, cun prazo de reclamacións ata o día 9. No caso de que o número de solicitudes supere as prazas dispoñibles, o 10 de abril realizarase un sorteo público na Casa da Cultura e o 11 de abril daranse a coñecer as listas definitivas.
O Concello de Bergondo recorda que a actividade só se levará a cabo se se alcanza un mínimo de oito participantes por grupo e un máximo de doce. Ademais, resérvase o dereito de realizar modificacións na organización por motivos loxísticos ou por requerimentos normativos.