O Concello de Arteixo solicitará a adquisición dun autobús eléctrico para noventa persoas
O Concello de Arteixo presentará unha nova solicitude de fondos europeos co obxectivo de introducir melloras tecnolóxicas no ámbito da mobilidade. O investimento total previsto para estes proxectos ascende a 15 millóns de euros, dos cales 9,1 millóns se pedirán a Europa a través dos fondos Next Generation e os 6 millóns restantes serán achegados polo propio Concello.
Entre as actuacións previstas destaca a adquisición dun autobús eléctrico de doce metros de lonxitude e con capacidade para noventa persoas, co propósito de promover un transporte máis sostible. Ademais, contempla a creación dun intercambiador modal que facilite a conexión entre diferentes medios de transporte.
No ámbito da xestión da mobilidade, o Concello impulsará a posta en marcha dunha plataforma dixital que permitirá unha mellor planificación e control dos desprazamentos. Complementariamente, instalaranse sensores para a monitorización do tráfico, co fin de mellorar a seguridade viaria e reducir atascos.
Estas iniciativas enmárcanse nas liñas de traballo xa concedidas que o Concello desenvolve con fondos europeos e que buscan modernizar as infraestruturas locais. Abordará todas estas cuestións e o proxecto Londra, centrado na rexeneración do río, no próximo pleno.