O Concello de Arteixo saca a licitación o contrato das obras para rehabilitar o Balneario
O Concello de Arteixo vén de anunciar que saca a licitación o contrato das obras para a rehabilitación do Balneario, cun orzamento total de 2,8 millóns de euros. Esta iniciativa enmárcase no Plan de Recuperación, Transformación e Resiliencia, financiado pola Unión Europea a través dos fondos NextGeneration.
Expoñen nunha publicación en redes sociais que segundo o convenio establecido con Turismo de Galicia, a Xunta achegará 2 millóns de euros para a execución do proxecto, mentres que o restante será financiado con fondos municipais.
O obxectivo principal desta actuación é dotar ao Concello dun edificio adecuado para o uso e goce das augas mineromedicinais da zona. As novas instalacións converteranse en termas públicas abertas a todos os veciños, ofrecendo un servizo de benestar e lecer que potenciará o aproveitamento dos recursos termais do municipio.