O concello de Arteixo presentará o Plan de Acción Integrado (PAI) para os Fondos Feder
O Concello de Arteixo presentará no próximo pleno o denominado Plan de Acción Integrado (PAI), co obxectivo de competir na nova convocatoria dos Fondos Feder, que se enmarcan dentro das Estratexias de Desenvolvemento Local. A través deste plan, o Concello solicitará un total de 6,1 millóns de euros para proxectos municipais, aínda que tamén se está a traballar noutras liñas de fondos europeos xa concedidas, como o Proxecto Londra, os Perte da auga ou os fondos Next Generation.
Un dos principais motivos para solicitar esta financiación é a necesidade de modernizar o concello no ámbito dixital e en aspectos relacionados coa innovación. A instalación dunha infraestrutura tecnolóxica destinada a incorporar sistemas intelixentes será un dos eixos centrais do PAI, cunha especial incidencia na mellora da mobilidade no municipio. Entre as melloras que se solicitarán destaca a adquisición dun autobús eléctrico de doce metros e con capacidade para noventa persoas, que operará na liña circular que une os núcleos urbanos. Este proxecto se complementa cunha anterior convocatoria de fondos europeos, na que se obtiveron recursos para a compra de dous microbuses eléctricos que circulan nas liñas das parroquias rurais.
Outra das propostas inclúe a creación dun intercambiador modal, que se situará na zona escolar do municipio e permitirá mellorar a conexión entre as liñas de autobuses metropolitanos e municipais. Tamén se implantará unha plataforma de xestión de mobilidade, que ofrecerá información en tempo real sobre os diferentes medios e rutas de transporte. Finalmente, o plan prevé a instalación dun sistema intelixente de monitorización do tráfico, con sensores e videovixilancia, co fin de mellorar a seguridade e a fluidez do tráfico no municipio.
Este será un dos principais proxectos do PAI, pero tamén se incluirán outras iniciativas que promoverán a peonalización en núcleos urbanos e a igualdade de oportunidades no ámbito educativo e cultural.