O Concello de Arteixo leva a pleno a aprobación da expropiación para o Proxecto Londra
O Concello de Arteixo someterá a aprobación no próximo pleno o proxecto de expropiación necesario para a execución do denominado Proxecto Londra, unha ambiciosa iniciativa que busca mellorar o estado dos ríos Bolaños e Bidueira, cun investimento total de 397.383 euros.
O obxectivo principal do proxecto é evitar o risco de inundación mediante a recuperación da morfoloxía e a dinámica natural dos cauces, ademais de impulsar solucións baseadas na natureza no entorno destes ríos. Esta actuación permitirá, ademais, a recuperación da fauna e flora autóctonas, fortalecendo a biodiversidade da zona e favorecendo un ecosistema máis equilibrado e sostible.
O Proxecto Londra, deseñado polo propio Concello, foi presentado no marco das axudas do Ministerio para a Transición Ecolóxica, evidenciando o compromiso de Arteixo coa protección do medio ambiente e a sustentabilidade.
Unha vez aprobado o proxecto de expropiación, o Concello poderá dar un paso máis cara á materialización desta actuación, que pretende converter o contorno dos ríos Bolaños e Bidueira nun espazo máis seguro e natural, ao tempo que se promove o equilibrio ecolóxico e se minimizan os riscos asociados ás crecidas dos ríos.