O Concello de Arteixo inicia a construción do novo parque comarcal de bombeiros en Morás
O Concello de Arteixo comezou hoxe a construción do novo parque comarcal de bombeiros, un proxecto que se enmarca no acordo acadado co Consorcio Provincial de Bombeiros a través dun convenio que establece o traslado das actuais instalacións do polígono de Sabón a unha nova localización no polígono de Morás.
As actuais dependencias do parque de bombeiros atópanse nunha parcela municipal que alberga outros servizos como o departamento de recollida de residuos, obras e protección civil. Para facilitar a construción do novo parque, o Concello segregou 4.000 metros cadrados dunha parcela de titularidade municipal no polígono de Morás. Este proxecto, aprobado polos técnicos do Consorcio de Bombeiros, supón un investimento de 1,3 millóns de euros e permitirá modernizar e ampliar as actuais instalacións.
Con esta iniciativa, o Concello de Arteixo segue a desenvolver os trámites necesarios para trasladar os servizos municipais que actualmente se atopan na parcela de obras municipal, onde ademais do parque de bombeiros están situados a maquinaria e as oficinas de obras, o sistema municipal de recollida de residuos, o servizo de limpeza viaria, o depósito de coches da grúa municipal e as instalacións de Protección Civil. O crecemento destes servizos municipais deixou obsoletas as actuais instalacións, que carecen de espazo suficiente para albergar todos os vehículos e equipos.
O parque de bombeiros actual, ademais, presenta carencias en materia de accesibilidade e outras deficiencias estruturais, polo que o seu traslado é unha necesidade urxente. Para financiar a construción das novas instalacións destinadas a todos estes servizos públicos, o Concello subastou entre os anos 2022 e 2023 a parcela municipal onde se atopan as actuais dependencias. O terreo foi adquirido por Inditex por un importe de 5.082.000 euros, unha cantidade que permitirá acometer melloras en todas as infraestruturas municipais, incluído o novo parque de bombeiros.
A nova localización no polígono de Morás ofrece unha vantaxe estratéxica, xa que conta con mellores accesos á autovía A-6, o que permitirá reducir os tempos de resposta ante posibles emerxencias. Con este traslado, Arteixo dá un paso máis na modernización dos seus servizos públicos, garantindo unha maior eficiencia na atención á cidadanía e reforzando a seguridade da comarca.