O Concello de Abegondo traballa nas obras de novos accesos ao futuro centro de saúde
O Concello de Abegondo avanza na creación dos novos accesos ao futuro centro de saúde, que actualmente está en plena execución pola Xunta de Galicia. O goberno local iniciou as obras para abrir unha nova vía que conectará a estrada principal, a AC-542, co novo equipamento sanitario. Para a súa creación, o Concello investiu 110.000 euros na adquisición das fincas necesarias, tras as negociacións cos propietarios.
O novo vial partirá da zona da gasolinera e chegará á parte traseira do centro de saúde, onde tamén se atopan outras instalacións de uso común como o polideportivo, a piscina, o parque e o aula lúdica. O alcalde, José Antonio Santiso, xa mantivo contacto coa Consellería de Planificación de Infraestruturas para propoñer a construción dunha rotonda na intersección deste novo acceso coa estrada autonómica AC-542, o que permitirá mellorar a circulación e a seguridade viaria, especialmente na incorporación desde o carril que vén de San Tirso.
Ademais da apertura do vial, o Concello tamén está a renovar os servizos de abastecemento e saneamento na zona, onde se atopan tamén varios inmobles. Santiso asegurou que a creación dos accesos realízase con antelación “para garantir que existan no momento no que se finalicen as obras do edificio”. A previsión da Xunta é poder abrir o novo centro ao longo deste ano.
Sinalan que a construcción do novo centro de saúde de Abegondo avanza a bo ritmo e terá un papel destacado da madeira na súa estrutura. O proxecto, cun investimento total de 2.708.948 euros, contará cunha planta baixa dedicada aos servizos de asistencia médica, con consultas de xeneralistas e pediatría, así como a sala de mostras, enfermería, entre outras dependencias.
Na planta superior estarán os despachos e zonas para os profesionais, como unha sala de descanso e biblioteca, mentres que o soto acollerá as instalacións. A nova edificación estará situada na parcela adquirida polo Concello xunto ao actual centro de saúde e terá unha superficie total de 1.221 metros cadrados.