O Concello de Abegondo proporá no pleno un presuposto de 6,7 millones
O Concello de Abegondo confecciona uns orzamentos para o exercicio deste ano á alza e cunha eminente visión social. O goberno local leva a proposta a pleno mañá xoves 16, cunha contía total que ascende a 6.726.677,12 euros, un 3,7% máis que en 2023.
O alcalde, José Antonio Santiso, destaca “ou importante esforzo investidor” dos orzamentos, cunha contía que alcanza os 1.665.750 euros, é dicir, case un 25% do total. A ampliación e mellora do patrimonio municipal será un dos grandes obxectivos.
Así, a rehabilitación da leira Os Loureiros, para convertela en centro cultural e social de referencia aglutina 424.743,06 euros de fondos propios, que se unirán á axuda de 1,12 millóns de euros lograda dos Next Generation.
A rede de locais sociais experimentará notables accións de modernización, para a que o goberno local reserva unha partida de 145.000 euros. O Concello aposta tamén por continuar o acordo coa Garda Civil e reformar as súas dependencias, apoiando o imprescindible servizo de seguridade que presta ao estar no municipio. Para iso destina 61.500 euros.
A seguridade viaria tamén acapara investimentos, cun plan de reparación de camiños nas diferentes parroquias por importe de 350.351,97 euros. Tamén se consigna unha partida de 75.000 euros para vías rurais, coa subvención de 61.000 de Medio Rural.
Santiso resalta que un apartado que contará con importantes consignacións é o de asistencia social. Supoñerá o 24% do orzamento. “As partidas para atención á dependencia, programas de maiores ou para persoas con discapacidade serán sempre indiscutibles”, asegura.
Así mesmo, o rexedor sinala que a proposta recolle as reservas de fondos necesarias para iniciativas “básicas” como é o caso da atención temperá, as axudas a situacións de emerxencia social, as actividades deportivas e culturais, a escola infantil municipal ou a aula lúdica.
Ademais dos orzamentos, o Concello leva a pleno a actualización da Relación de Postos de Traballo. O cambio consiste no incremento da xornada do arquitecto, que pasará do 75% actual ao 100%. O goberno municipal explica que a entrada en vigor do Plan Xeral aumentará a demanda dos seus servizos e a xornada parcial resulta insuficiente.