O Concello de Abegondo aproba participar no POS da Deputación
No pleno ordinario da corporación do Concello de Abegondo aprobáronse as propostas para participar no Plan Único de Concellos da Deputación da Coruña. Acolleuse á posibilidade ofrecida pola Deputación e destinará este exercicio o 100 % do POS a gasto corrente. Esta medida permitirá incrementar o capítulo de investimentos propios do orzamento municipal e executar máis actuacións sen estar suxeitas ás restricións das axudas provinciais.
O POS ascende a 735.650,48 euros. Ademais, no Plan Complementario inclúese o proxecto de reparación da estrada entre A Calva, en Cerneda, e A Fraga, en Vizoño, cun orzamento de 115.690,01 euros. Tamén se ratificou o POS Adicional para gastos sociais, que asigna 74.359,01 euros a gasto corrente e 2.500 euros a investimentos. A aprobación foi unánime, ao igual que a redución da débeda co ente provincial polos préstamos dos POS de exercicios anteriores, cunha asignación de 131.758,30 euros.
Durante a sesión plenaria tamén se aprobou a actualización do inventario municipal para incluír, entre outros aspectos, o terreo adquirido polo Concello xunto ao novo centro de saúde, que permitirá crear novos accesos. Trátase dunha finca de 1.231 metros cadrados cun valor de 49.000 euros. O alcalde, José Antonio Santiso, avanzou que xa existe un acordo coa gasolineira para crear unha entrada de 6 metros de ancho, mellorando o acceso ao centro de saúde, o polideportivo, a piscina e o colexio. Ademais, solicitou á Consellería de Infraestruturas colaboración para construír unha rotonda na AC-542.
O CONVENIO CO DEPORTIVO
No apartado de mocións, o BNG solicitou a revisión dos convenios asinados co Real Club Deportivo da Coruña sobre a cidade deportiva. O alcalde aclarou diversos aspectos erróneos das consideracións do edil nacionalista, como o uso por parte dos clubes locais. Explicou que no seu momento foi ofrecido tanto ao San Tirso como ao Vizoño, pero rexeitárono, e actualmente varias seccións do Xuventude de Crendes adestran alí.
Santiso tamén destacou que as achegas do Deportivo revalorizanse co tempo polo incremento do IPC e que a obra en execución do club tamén xerou ingresos municipais a través do ICIO. “Nós consideramos que o acordo foi e é moi beneficioso para Abegondo, dános unha enorme visibilidade diaria en medios de índole nacional, ademais de contar coa infraestrutura”, expresou o rexedor. Ademais, lembrou que o BNG, cando gobernou, non promoveu ningunha revisión do convenio. A moción foi rexeitada, obtendo só o voto favorable do edil do BNG. O PP votou en contra e o PSOE abstívose.