O Concello de Abegondo acolle este 8 de novembro a segunda edición do Raid de Regularidade Fototurístico “Galicia Edition”
Este sábado 8 de novembro terá lugar a segunda edición do raid de regularidade fototurístico “Galicia Edition”, cunha saída dende o Concello de Abegondo. A proba, organizada por Clásicos del Atlas coa colaboración municipal, reunirá 54 vehículos, entre turismos e todoterreos.
Os participantes poderán comezar a congregarse no campo da feira de San Marcos desde as 9.00 horas para as verificacións administrativas e técnicas, e a saída oficial dará comezo arredor das 11.00 horas. O percorrido cubrirá varias localidades da contorna (Abegondo, Mesía, Frades, Arzúa, Oroso e Ordes) e espera que os equipos regresen á finca As Quintás aproximadamente entre as 19.00 e as 20.00 horas.
Trátase dunha proba de regularidade, o que implica que non se trata de “quen vaia máis rápido”, senón de quen cumpra o ritmo medio establecido e complete tamén nas paradas os puntos fotográficos turísticos que se dispoñen durante o evento.
O prezo de inscrición para os equipos, tal como se recolle na web oficial da organización, é de 145 euros por equipo, o cal inclúe organización, logísticas, roadbook, aplicación de navegación, seguro, asistencia, comida picnic e cea final, adhesivos e dorsal, trofeos e pack de benvida.
Os organizadores fan un chamamento á afección e á veciñanza a que se acheguen ao campo da feira pola mañá para ver a saída e tamén ao paso dos equipos ao longo do día, lembrando que a proba atravesa varios concellos e carreteras locais. Unha ocasión para gozar do deporte de motor nun formato distinto, cun enfoque paisaxístico e lúdico.