O Concello de A Coruña inicia a renovación do campo de fútbol Víctor Fernández Alonso
O Concello de A Coruña adxudicou á empresa OPSA os traballos de mellora do campo de fútbol municipal Víctor Fernández Alonso, coñecido como a Leyma. Cun orzamento de máis de 430.000 euros e un prazo de execución de tres meses, a actuación busca modernizar esta instalación deportiva clave para o fútbol local.
A intervención, que comezará en xaneiro, inclúe a renovación do céspede artificial por un de última xeración, a substitución das porterías de fútbol 11 e fútbol 7 e a actualización das marquesiñas dos bancos. Ademais, remodelarase a rede de rego con tecnoloxía automatizada e o firme dos accesos ao edificio dos vestiarios. Tamén se construirá unha rampla para facilitar a entrada ás bancadas a persoas con mobilidade reducida.
Outras melloras inclúen o saneamento do muro perimetral, a renovación do balado sur e das redes que evitan a saída de balóns ao exterior. Estas actuacións completan os traballos recentes de modernización da iluminación, agora de tecnoloxía LED, que xa reduciu á metade o consumo enerxético do recinto.
Esta iniciativa forma parte do compromiso do Goberno de Inés Rey co deporte local. Ademais, o Concello está a impulsar o Plan Director de Instalacións e Equipamentos Deportivos, unha folla de ruta para modernizar os espazos deportivos municipais e atender as necesidades futuras da cidade neste ámbito.