O Concello da Coruña pon en marcha as obras da nova zona de ocio infantil da Silva
O Concello da Coruña deu inicio ás obras de construción da nova área de ocio infantil da Silva, un proxecto destinado a dar resposta a unha das principais demandas da veciñanza. A actuación inclúe a creación dun espazo de xogos para as crianzas e unha pista multideporte, promovendo así a práctica de actividades ao aire libre.
Os traballos están a desenvolverse na parte traseira do centro social da Silva e xa avanzan cos primeiros movementos de maquinaria e tarefas de picado no pavimento. Segundo destacou a concelleira de Infraestruturas e Mobilidade, Noemí Díaz, a intervención abrangue preto de 800 metros cadrados nunha zona ata agora infrautilizada, que pasará a albergar novo equipamento público para o uso e desfrute da cidadanía.
A nova área infantil está deseñada para nenos e nenas de 3 a 6 anos, contando con xogos adaptados para crianzas con mobilidade reducida. Esta medida enmárcase na aposta do Goberno de Inés Rey por políticas inclusivas que favorezan a accesibilidade nos espazos públicos. Pola súa banda, a pista multideporte permitirá a práctica de disciplinas como fútbol sala e baloncesto. O recinto contará cun valado perimetral e unha rede de protección para evitar a saída de balóns fóra da pista.
A intervención contempla tamén a creación de novas zonas verdes, coa instalación dunha xardineira con arbustos no sector sur da parcela e a plantación de cinco pradairos, que funcionarán como barreira vexetal entre o centro social e a área infantil. Ademais, instalaranse bancos, papeleiras e unha fonte adaptada para persoas con mobilidade reducida.
Tamén se habilitará un percorrido accesible nun dos laterais do centro social, mellorando a accesibilidade á parte traseira do edificio, onde estarán situados os novos espazos de xogo e a pista multideporte.
A construción desta nova infraestrutura supón un investimento de 345.000 euros e foi un dos compromisos adquiridos polo Goberno de Inés Rey neste mandato. O prazo de execución estimado é de oito meses, condicionado polas condicións meteorolóxicas que poidan influír no desenvolvemento dos traballos.