O Concello da Coruña organiza visitas guiadas á exposición ‘A cidade das artes’
O Concello da Coruña, en colaboración coa Real Academia Galega de Belas Artes (RAGBA), organiza catro visitas guiadas á exposición ‘A cidade das artes’, unha mostra aberta á cidadanía no Kiosco Alfonso que conmemora o 175 aniversario da RAGBA. A exhibición ofrece un percorrido artístico e documental pola historia que conecta a institución coa cidade desde a súa fundación no ano 1849 ata a actualidade.
A mostra está composta por 150 pezas creadas por membros da Real Academia e estudosos das artes do país. As obras están organizadas en sete seccións que representan as disciplinas que conforman a Real Academia: pintura e gravado, escultura, arquitectura, música, arqueoloxía, museoloxía e artes da imaxe.
“Agora, co obxectivo de reforzar a súa difusión e visibilizar o legado histórico da Real Academia, impulsamos esta quenda de percorridos guiados cos que tamén queremos contribuír a visibilizar o traballo das académicas”, destacou o concelleiro de Cultura e Turismo, Gonzalo Castro. Ademais, sinalou que esta iniciativa coincide coa programación especial do Concello polo 8-M, Día da Muller, como parte dos actos conmemorativos.
O calendario de percorridos guiados comezará o venres 14 de marzo, sendo esta a primeira das catro datas previstas. As visitas terán lugar sempre en venres: o 28 de marzo, o 11 de abril e o 25 de abril, todas elas ás 18.00 horas no Kiosco Alfonso. Durante as visitas, as persoas participantes poderán descubrir en detalle os contidos da mostra ‘A cidade das artes’.
As persoas interesadas en solicitar praza para participar nos percorridos guiados deberán enviar un correo electrónico ao enderezo kioscoalfonso@coruna.gal, indicando o día da visita escollida e o nome das persoas asistentes.