O Concello da Coruña inicia as obras para transformar o parque do Observatorio na gran área verde da Agra
O Concello da Coruña deu o pistoletazo de saída ás obras de reforma interior do parque do Observatorio, situado no barrio da Agra do Orzán. O primeiro paso consistirá na colocación das casetas de obra e na construción dos novos valados que delimitarán as instalacións da Axencia Estatal de Meteoroloxía (AEMET). Unha vez finalizada esta fase, derrubaranse os muros exteriores que actualmente limitan o acceso polas rúas Canceliña e Gregorio Hernández.
A alcaldesa, Inés Rey, destacou que este proxecto responde a unha demanda histórica da veciñanza: “A Agra precisa dunha gran área verde aberta á cidadanía. Trátase dun barrio moi compacto, polo que é imprescindible gañar espazos de convivencia e lecer”.
Este avance foi posible logo de que o Concello da Coruña recibise en xuño a concesión demanial dos terreos da AEMET. O plan de traballo foi consensuado a pasada semana nunha reunión técnica entre persoal municipal e representantes da Axencia.
Ademais, o parque ampliarase grazas á incorporación dunha parcela anexa: o antigo soar das Adoratrices. Trátase de máis de 3.000 metros cadrados cedidos gratuitamente, que se sumarán ao espazo público tras a súa urbanización pola promotora propietaria. Esta cesión, aprobada no Pleno municipal de xullo, tamén dá cumprimento a unha sentenza firme do Tribunal Superior de Xustiza de Galicia.