O Concello da Coruña inicia a mellora das rúas Silva de Arriba e Benela na Silva
O Concello da Coruña vén de adxudicar os traballos de mellora da calzada en dúas rúas do núcleo da Silva, dando resposta a unha histórica demanda da veciñanza. As actuacións, que se levarán a cabo nas rúas Silva de Arriba e Benela, permitirán renovar o firme e mellorar as condicións de circulación nestas vías, moi deterioradas polo paso do tempo.
Segundo informou o Goberno municipal que lidera Inés Rey, a intervención abranguerá a totalidade das dúas rúas, que presentan anchos variables entre 2,8 e 6 metros. Actualmente, o firme atópase en mal estado, con zonas onde incluso medra vexetación na propia calzada.
Na rúa Silva de Arriba, que conecta Cances e A Silva coa rúa Alcalde Jaime Hervada, a actuación comprenderá un tramo de 400 metros. A obra inclúe non só a renovación do firme, senón tamén a limpeza das marxes e outras tarefas de adecuación necesarias.
Pola súa banda, na rúa Benela, que une Silva de Arriba coa avenida de Fisterra, os traballos abranguerán 142 metros. Procederase ao fresado completo da calzada, á substitución de elementos deteriorados e á adaptación da vía ás necesidades actuais.
O investimento para esta actuación ascende a 90.000 euros e o prazo estimado de execución é de dous meses. A empresa Excavaciones y Obras Candal será a encargada de acometer os traballos.
Desde o Concello destacan que esta intervención enmárcase no compromiso de seguir mellorando as infraestruturas dos barrios e responder ás necesidades reais da cidadanía.