O Concello da Coruña impulsa o proxecto Vai a Banda, reunindo máis de 5.000 escolares
O Concello da Coruña promove a segunda edición de Vai a Banda, un proxecto didáctico e participativo en colaboración coa Banda Municipal de Música da Coruña (BMMC) que este ano duplica a participación do anterior, reunindo a máis de 5.000 escolares de 50 centros educativos de toda Galicia.
Consolidado como unha das iniciativas educativas e culturais máis relevantes do curso, Vai a Banda reafirma o compromiso do Goberno de Inés Rey coa educación musical e co achegamento da cultura ás novas xeracións.
O proxecto desenvolverase os días 1, 2, 3, 4, 22, 23 e 25 de abril no Centro Ágora da Coruña, onde terán lugar os concertos. Durante estas datas, organizaranse varias sesións musicais con tres centros educativos en cada unha.
Un dos puntos clave de Vai a Banda é a súa capacidade de adaptarse ás diferentes etapas educativas, permitindo a participación de alumnado desde educación infantil ata o terceiro ciclo de educación primaria. As propostas musicais están deseñadas para axustarse ás competencias e destrezas do estudantado, asegurando unha experiencia enriquecedora para todos.
Desde setembro, os centros escolares traballan co material didáctico elaborado pola Banda Municipal de Música da Coruña, que inclúe partituras e audios adaptados a cada nivel. Este material permítelles preparar as sùas actuacións para abril, onde non só asistirán aos concertos, senón que tamén subirán ao escenario para tocar xunto á BMMC, experimentando en primeira persoa o valor da interpretación en directo.
O programa musical desta edición inclúe unha selección de obras que mesturan tradición e actualidade, garantindo unha experiencia divertida e educativa para o alumnado. O evento está estruturado para favorecer tanto a participación activa no escenario como a implicación coral desde as butacas, fomentando a interacción e o desfrute de todas e todos os asistentes.