O Concello da Coruña concede 2.313 bolsas de comedor para o curso 2024/2025
O Concello da Coruña fixo pública a listaxe provisional de beneficiarios das bolsas de comedor para o curso escolar 2024/2025. Concedéronse un total de 2.313 bolsas das 4.946 solicitudes recibidas, enmarcadas nas políticas de cobertura social do Goberno local.
A partir de hoxe, as familias poden consultar a listaxe provisional a través do portal web do Concello en www.coruna.gal/servizossociais, así como nos taboleiros dos centros cívicos municipais. O período para a presentación de alegacións á listaxe abrirase mañá e durará dez días hábiles. Durante este prazo, as persoas beneficiarias e interesadas poden presentar alegacións e achegar documentos adicionais.
As alegacións poden realizarse de maneira presencial nos Rexistros municipais de María Pita, Ágora, Fórum e a Franxa, ou de forma telemática a través da sede electrónica do Concello. Tamén é posible utilizar outros medios permitidos polo artigo 16.4 da Lei 39/2015 do Procedemento Administrativo Común das Administracións Públicas.
O Goberno de Inés Rey busca garantir que todas as familias poidan beneficiarse de servizos como o comedor escolar, co obxectivo de promover a igualdade e o acceso universal a recursos educativos e sociais.