O Concello da Coruña activa os Bailes de Maiores nos centros cívicos a partir do 14 de novembro

As sesións, cun prezo simbólico de 1,50 euros, celebraranse en distintos centros cívicos en horario de tarde e buscan fomentar a socialización e o benestar das persoas maiores

O Concello da Coruña poñerá en marcha o vindeiro 14 de novembro unha nova edición dos Bailes de Maiores, unha iniciativa municipal que forma parte do programa de envellecemento activo. O obxectivo é favorecer a participación social, a convivencia e o benestar físico e emocional das persoas maiores mediante un lecer accesible e de proximidade.

As sesións desenvolveranse de 17.00 a 20.30 horas en diferentes centros cívicos da cidade e contarán cun custo simbólico de 1,50 euros por persoa, co propósito de facilitar a asistencia e promover a rotación de participantes ao longo da semana. O Concello achegará todos os medios técnicos e musicais necesarios para garantir o bo desenvolvemento das actividades.

A alcaldesa, Inés Rey, subliñou que 'con estes bailes reforzamos o envellecemento activo, combatemos a soidade non desexada e creamos espazos de encontro accesibles e próximos, onde a música e o baile contribúen a mellorar a saúde e a calidade de vida'.

A programación será rotatoria entre os diferentes centros cívicos municipais e poderá modificarse por razóns organizativas, algo que se comunicará con antelación polos canais oficiais. Cada sesión contará con persoal de apoio e animación musical para ofrecer unha experiencia enriquecedora e diversa.

Esta iniciativa enmárcase na aposta do Goberno local pola mellora da calidade de vida das persoas maiores e pola dinamización da rede de centros cívicos, reforzando así unha liña de traballo prioritaria neste mandato.

Programación prevista:

• Venres, 14 de novembro | Centro Cívico Os Mallos | 17.00-20.30 h
• Sábado, 15 de novembro | Centro Cívico San Diego | 17.00-20.30 h
• Domingo, 16 de novembro | Centro Cívico Monte Alto | 17.00-20.30 h
• Luns, 17 de novembro | Centro Cívico Monelos | 17.00-20.30 h
• Mércores, 19 de novembro | Centro Participativo O Birloque | Semanas alternas | 17.00-20.30 h
• Xoves, 20 de novembro | Centro Cívico Castrillón / Centro Cívico Eirís | Semanas alternas (inicia en Castrillón) | 17.00-20.30 h

O Concello anima á veciñanza maior a participar activamente nesta proposta e a consultar as actualizacións de datas e localizacións nos taboleiros dos centros cívicos e nas canles municipais.