O Complexo María Manuela de Boqueixón recibe o Premio Juana de Vega de Intervencións na Paisaxe 2024
O Complexo Enoturístico María Manuela, situado en Boqueixón (A Coruña), foi galardoado esta mañá co Premio Juana de Vega de Intervencións na Paisaxe 2024 na categoría “Edificacións e instalacións produtivas no medio rural”. A Fundación Juana de Vega recoñeceu o proxecto como un exemplo destacado de integración paisaxística e sostibilidade.
Ademais, entregáronse dous accésits: un ao proxecto “Xanceda: un ciclo de auga 360º” da Casa Grande de Xanceda (Mesía, A Coruña), e outro á horta e o invernadoiro do restaurante Culler de Pau (O Grove, Pontevedra). O xurado tamén outorgou unha mención especial ao Forno de pan Aboamigalla, situado en Cea (Ourense).
O presidente da Fundación, Enrique Sáez, destacou a importancia desta primeira edición da categoría, sinalando que recoñece “unha vangarda cos pés na terra”, vinculada a produtos emblemáticos de Galicia como o viño, o leite e o pan. O proxecto gañador, obra dos arquitectos Alfonso Salgado e Francisco X. Liñares, combina a adega e seis cabanas perfectamente integradas nunha carballeira, con materiais sostibles e un respecto máximo polo ecosistema local.
Pola súa banda, o xurado tamén valorou a capacidade dos accésits e da mención especial para propoñer solucións innovadoras e transferibles, como a aposta pola recuperación de especies vexetais autóctonas en Culler de Pau ou o deseño delicado do Forno de Cea que mellora paisaxes industriais.