O Colexio de Médicos da Coruña, galardoado pola súa traxectoria e compromiso profesional
O Colexio Oficial de Médicos da Coruña recibiu un recoñecemento especial durante a VIII Convención da Profesión Médica organizada pola Organización Médica Colexial de España. Este galardón, que honra a súa "excelencia e compromiso profesional" como corporación pública, chega nun ano simbólico para a institución, que conmemora 130 anos desde a súa fundación polo doutor Ramón Pérez Costales.
O acto, que tivo lugar na capital española, contou coa entrega dunha placa conmemorativa por parte de Rosa Arroyo, vicepresidenta segunda do Consello Xeral de Colexios Oficiais de Médicos de España. Luciano Vidán, presidente do Colexio coruñés, foi o encargado de recibir o premio, expresando o seu orgullo e agradecemento en nome dos máis de 7.500 médicos que forman parte da institución.
Vidán destacou que este recoñecemento é o reflexo do traballo e dedicación de xeracións de profesionais que, desde hai máis dun século, contribuiron ao avance da medicina na provincia e en toda Galicia. “Tamén é un tributo ao esforzo continuo da actual Xunta Directiva por garantir a excelencia, a calidade na xestión e o respecto á ética profesional”, engadiu.
O presidente subliñou que este tipo de distincións reforzan a motivación do Colexio para seguir traballando con rigor e vocación ao servizo da sociedade, garantindo que a institución manteña a súa relevancia como un referente na sanidade galega e estatal.