O ciclo 'As mellores películas da historia' trae este xoves ao Teatro Colón a ‘Psicosis’ de Alfred Hitchcock
A que segue a ser a gran película de culto nos xéneros do terror e o thriller psicolóxico, a 'Psicosis' de Alfred Hitchcock, chega este xoves 23 ao Teatro Colón (19.30 horas) na que será a penúltima sesión do ciclo 'As mellores películas da historia', promovido polo Concello neste primeiro semestre de ano.
Unha das particularidades do ciclo é que as proxeccións se levan a cabo nun formato en 35 mm, o que supón unha oportunidade única para gozar de películas clásicas como Psicosis, con escenas que pasaron á historia, como a fuga da protagonista, Marion Crane -interpretada por Janet Leigh- e a inquietante personaxe de Norman Bates, o xerente do motel dos horrores, que interpreta Anthony Perkins.
A prestixiosa publicación británica Sight and Sound sitúa a Psicosis no posto trixésimo primeiro na listaxe das grandes longametraxes de todos os tempos, un ranking elaborado segundo o criterio e as votacións de cineastas, académicos e especialistas da sétima arte.
Coas últimas entradas á venda, aínda é posible conseguir pases a través da web de Ataquilla, así como no despacho de billetes do IMCE na praza de Ourense. Tamén se habilitará a venda de entradas no Teatro Colón o propio día da proxección, sempre e cando haxa pases dispoñibles.
Paco Plaza protagoniza o coloquio aberto ao público
A proxección da película irá acompañada, como xa é habitual, dun coloquio aberto ao público. O convidado especial desta sesión será o cineasta valenciano Paco Plaza, director e creador, xunto a Jaume Balagueró, da exitosa saga REC.
Plaza, que tamén dirixiu pezas como Verónica (2017) ou Quien a hierro mata (2019), co galego Luís Tosar como protagonista, é o gran referente do xénero de terror no cinema do país. Recentemente, a finais de 2023, estreou en Netflix a súa última película, Hermana muerte (2023).
No coloquio deste xoves 23, Plaza estará acompañado por Javier Trigales, guionista e coordinador do ciclo 'As mellores películas da historia'.
O ciclo rematará o vindeiro mes de xuño
A posta en marcha do ciclo 'As mellores películas da historia' no Teatro Colón foi unha das apostas do Goberno de Inés Rey para potenciar a programación cultural do Concello neste primeiro semestre de ano, atendendo á boa recepción que tivo, por exemplo, o ciclo de cinema 'Colón Noir', que se realizou o ano pasado.
Neste sentido, 'As mellores películas da historia' rematará o día 13 de xuño, coa derradeira proxección en 35 mm prevista na programación. Será El espíritu de la colmena, de Víctor Erice.