O Centro Oceanográfico da Coruña celebra a XV Xornada de Portas Abertas con diversas actividades
O Centro Oceanográfico da Coruña celebrará este sábado 7 de xuño a XV edición da súa tradicional Xornada de Portas Abertas, unha cita xa consolidada no calendario divulgativo da cidade que permitirá achegar á cidadanía ao traballo científico que se desenvolve no seu interior. A iniciativa enmárcase nas actividades do Día Mundial dos Océanos, promovidas polo Instituto Español de Oceanografía (IEO-CSIC).
Durante a xornada, as persoas visitantes poderán percorrer as instalacións deste centro de referencia en investigación mariña, localizado no paseo marítimo e situado nun singular edificio deseñado por Vicente Roig, inaugurado en 1974. Ao longo do día, o equipo científico abrirá as portas dos seus laboratorios e espazos de traballo para explicar como se estudan os océanos, a súa biodiversidade e os retos que enfrontan.
A través de obradoiros interactivos e demostracións en directo, o público poderá comprender de forma práctica e entretida a importancia do plancto na cadea alimentaria mariña, o funcionamento físico dos océanos, a metodoloxía utilizada no estudo das pesqueiras ou como se realiza unha expedición oceanográfica. Tamén haberá un espazo especialmente dedicado ao público infantil, con xogos e propostas adaptadas aos máis pequenos.
Como novidade destacada desta edición, ofrecerase unha visita guiada con intérprete de lingua de signos, prevista para as 11.00 horas, pensada para facilitar o acceso ao contido da xornada a persoas con discapacidade auditiva. Para participar nesta actividade será necesaria a inscrición previa a través deste formulario habilitado pola organización.
A Xornada de Portas Abertas desenvolverase en horario de 11.00 a 14.00 e de 16.00 a 20.00 horas, e a entrada será libre e gratuíta para todo o público interesado. A cita representa unha oportunidade única para coñecer de preto a ciencia mariña feita desde A Coruña e o labor do persoal investigador que traballa para conservar os recursos do océano.