O Centro Ágora acolle o 12.º Festival Dálle Donaire, unha cita clave da cultura tradicional galega
O Centro Ágora da Coruña será este sábado, 5 de abril, o escenario da 12.ª edición do Festival Dálle Donaire, un dos eventos máis destacados da cultura tradicional galega na cidade. Organizado pola Asociación Cultural Donaire co apoio do Concello da Coruña, este ano terá un carácter especialmente simbólico ao coincidir co 25.º aniversario da entidade.
O festival contará coa participación de todos os grupos que forman parte da escola Donaire, desde os máis pequenos ata os adultos, ofrecendo así unha mostra da ampla diversidade e calidade do traballo da asociación. O público poderá gozar dun completo programa de música e baile tradicional galego en dúas sesións, ás 12.00 horas e ás 17,30 horas.
A Asociación Cultural Donaire consolidouse ao longo de dúas décadas e media como unha das principais referencias na promoción e transmisión da cultura tradicional galega na Coruña, cun forte compromiso coa formación e a participación interxeracional. Este labor está aliñado co apoio que o Goberno municipal de Inés Rey brinda a proxectos culturais de base e á difusión do patrimonio inmaterial galego.
“A celebración do 25.º aniversario de Donaire supón unha oportunidade para recoñecer o seu traballo exemplar no ámbito da cultura popular e a súa contribución á vida cultural da cidade”, destacou a alcaldesa da Coruña, Inés Rey.
As entradas para o festival están dispoñibles a través da plataforma en liña, cun prezo de 4,50 euros para unha das sesións ou de 6,80 euros para asistir a ambas. O Concello recomenda adquirir as entradas con antelación debido á capacidade limitada do recinto.