O CEIP Ponte dos Brozos, mellor centro Zinkers da área coruñesa
O CEIP Ponte dos Brozos foi distinguido pola Fundación Repsol como mellor centro Zinkers da área coruñesa, un recoñecemento que premia a implicación do alumnado e do profesorado no programa educativo Zinkers, orientado a promover o coñecemento sobre enerxía, cambio climático e desenvolvemento sostible. A entrega tivo lugar na Fundación Paideia (A Coruña) e contou coa presenza da concelleira de Igualdade, Servizos Sociais, Sanidade e Educación, Inés Ramos, en representación do Concello de Arteixo.
O galardón inclúe unha dotación de 2.000 euros para impulsar novas iniciativas didácticas. Desde o centro salientan que o proxecto combina traballo por proxectos, experimentación en aula e accións de sensibilización, co obxectivo de consolidar hábitos responsables e pensamento crítico sobre o uso da enerxía e o impacto ambiental. O Concello felicitou a comunidade educativa por manter o colexio como referente innovador e comprometido co futuro.