O Castelo de San Antón celebra o Día Internacional do Patrimonio con visitas e obradoiros para todas as idades este sábado 15
O Concello da Coruña conmemorará este sábado 15 o Día Internacional do Patrimonio Mundial cunha programación especial no Museo Arqueolóxico do Castelo de San Antón. Haberá percorridos guiados polas salas do museo e obradoiros participativos para público infantil e adulto, de acceso gratuíto e con prazas limitadas.
O concelleiro de Cultura e Turismo, Gonzalo Castro, convidou a cidadanía a 'desfrutar desta xornada que contribúe á posta en valor dos museos históricos da Coruña, con propostas abertas a todas as idades e, ademais, de balde'. As visitas guiadas realizaranse ás 12.00 e ás 17.30 horas, con 25 prazas en cada quenda. A inscrición pode facerse no teléfono 981 189 850.
En paralelo, desenvolveranse varios talleres creativos. 'Fiando o fío', orientado a nenas e nenos de 6 a 12 anos, comezará ás 11.45 horas e conta con 20 prazas. A actividade propón achegarse á moda prehistórica para coñecer as formas de vida da época a través da indumentaria. A reserva de prazas está dispoñible na plataforma de ticketing do Concello.
Para público adulto, o obradoiro 'Á luz da lucerna' terá lugar ás 18.00 horas, con 15 prazas. A proposta percorre a Prehistoria a través das primeiras técnicas de produción do lume e incluirá a fabricación dunha lucerna mediante moldes.