O Campamento de Nadal de Curtis ofrecerá actividades de conciliación en Nadal e Reis
O Concello de Curtis pon en marcha un novo Campamento de Nadal dirixido á rapazada do municipio, unha iniciativa de conciliación familiar que se desenvolverá durante as vacacións de inverno 2025/2026. O programa terá lugar nos centros de ocio de Curtis e de Teixeiro e ofrecerá actividades lúdicas en horario de mañá, de 8.00 a 14.00 horas.
Segundo recolle a folla informativa municipal, o campamento celebrarase os días 22, 23, 24, 26, 29, 30 e 31 de decembro de 2025 e o 2, 5 e 7 de xaneiro de 2026, cubrindo así os principais días non lectivos do Nadal e do período de Reis. O número de prazas é limitado, polo que o Concello recomenda tramitar a inscrición canto antes.
O prazo para presentar solicitudes permanecerá aberto ata o luns 15 de decembro. As familias deberán cubrir o formulario de inscrición, no que se recollen os datos persoais e médicos da persoa participante, así como os contactos de referencia en caso de urxencia. O documento inclúe tamén a autorización para tomar parte no Campamento de Nadal, os permisos de recollida por parte de persoas adultas designadas e o consentimento para o uso de fotografías e vídeos das actividades, que se empregarán unicamente con fins informativos e de xustificación de subvencións.
A iniciativa, impulsada polo Concello de Curtis, conta coa colaboración do Centro de Información á Muller e enmárcase en programas de apoio á conciliación e á igualdade promovidos polas administracións públicas.