O bus por estrada na provincia da Coruña cumpre a terceira xornada de folga cun paro moi amplo e coa mediación do mércores no horizonte
O transporte de viaxeiros en autobús por estrada na provincia da Coruña viviu este luns 15 de decembro a terceira das catro xornadas de folga convocadas en decembro, cun seguimento “maioritario”, segundo os sindicatos, e cunha afectación notable nos servizos, especialmente nas principais estacións e nós de comunicación.
A convocatoria chega tras meses de bloqueo na negociación do convenio colectivo provincial. As organizacións sindicais reclaman un “convenio digno” que mellore salarios e garanta o poder adquisitivo con cláusula ligada ao IPC, ademais de avances na regulación da xornada, no control horario, nos permisos retribuídos e na conciliación.
Como nas xornadas anteriores, dende primeira hora despregáronse piquetes informativos en distintas estacións. En A Coruña, Santiago e Ferrol, a actividade foi moi baixa ao inicio da mañá, segundo recolleron distintos medios.
En Santiago, informouse de dificultades para a saída dos servizos mínimos nas primeiras horas e tamén se comunicou a rotura do parabrisas dianteiro dun autobús dunha das liñas urbanas, un feito do que se tivo constancia a través de fontes municipais.
No caso de Ferrol, fontes sindicais apuntaron que a xornada transcorreu con tranquilidade e que apenas se mantiveron algunhas rutas especiais vinculadas a necesidades concretas (centros con alumnado con necesidades especiais e servizos para persoas con discapacidade).
As reivindicacións céntranse en dous eixos. O primeiro é económico: os sindicatos critican que a proposta empresarial estea moi por debaixo do que consideran necesario e reclaman subas salariais “dignas” para 2025 e 2026, con garantía ligada ao IPC para non perder poder adquisitivo.
O segundo eixe é a xornada: denuncian quendas que poden chegar ás 12 ou 15 horas e piden reducir tempos de condución, limitar a dispoñibilidade ao servizo e actualizar ferramentas de control horario. Tamén poñen o foco na conciliación e na mellora de permisos retribuídos.
Ademais, as centrais inclúen entre as súas demandas unha mellora das condicións do persoal acompañante do transporte escolar, un colectivo que sinalan como especialmente precarizado.
As catro xornadas de folga foron os días 5, 12 e 15 de decembro, e queda convocado outro paro para o venres 19.
Segundo a información oficial difundida pola Xunta, a convocatoria abrangue os centros de traballo e o persoal ao que lle é de aplicación o convenio provincial do transporte de viaxeiros en autobús por estrada, así como a empresa Maitours.
En paralelo, as organizacións sindicais advertiron de que, se non hai avances, non descartan unha folga indefinida a partir de xaneiro.
A Consellería de Presidencia, Xustiza e Deportes publicou no DOG a orde cos servizos mínimos para estas xornadas, argumentando a necesidade de garantir dereitos esenciais vinculados á mobilidade, ao traballo e á educación.
De acordo coa información habilitada por Transporte Público de Galicia, nas rutas de menos de 25 quilómetros con paradas na provincia establécese o 50 % dos servizos nas franxas 06.00-09.00 e 18.00-21.00 horas. Nas rutas de máis de 25 quilómetros que conectan coa provincia e algunha das sete cidades galegas, fíxase unha expedición de ida e outra de volta con saída anterior ás 14.00 horas e posterior ás 18.00 horas.
Co conflito aberto, a mirada está posta agora na mediación convocada para o mércores 17 de decembro ás 16.00 horas no Consello Galego de Relacións Laborais, en Santiago. Alí están chamadas a sentar as asociacións patronais e o comité de folga, nun intento de achegar posturas antes da seguinte xornada de paro do venres 19.