O BNG traslada que queda só na defensa dunha residencia pública de maiores en Miño
O Bloque Nacionalista Galego (BNG) traslada que quedou só na defensa da creación dunha residencia pública de maiores na antiga escola de Gallamonde, logo da abstención do Partido Popular e do voto en contra do grupo de goberno do PSOE no pleno municipal. A formación nacionalista lamentou a falta de apoio a unha iniciativa que busca atender unha demanda social crecente na comarca.
O voceiro do BNG, Alberte G. Nicolás, criticou os argumentos do PSOE, baseados na distancia entre o centro e a vila de Miño, así como na falta dunha alternativa para o persoal de servizos e obras que actualmente ocupa o edificio. “Bendito problema sería ter que atopar unha nova localización para o persoal do Concello de aquí a 3 ou 4 anos, porque iso significaría que as nosas maiores poderían acceder a prazas públicas preto do seu fogar”, respondeu Nicolás ás declaracións de Emma González, voceira socialista.
O BNG defendeu que a proposta non só evitaría a deterioración dun edificio infrautilizado, senón que tamén cubriría unha carencia na comarca: a inexistencia dunha residencia pública. “Trátase dunha localización próxima ao núcleo de Miño, ben comunicada coa N-651, unha liña de autobús metropolitano e, proximamente, co novo enlace da AP-9, facilitando así o acceso tanto para traballadoras como para familiares”, explicou Nicolás.
Desde a formación nacionalista critican que “co seu voto, o PSOE pechou a porta a unha primeira interlocución coa Xunta de Galicia para sacar adiante esta proposta”, a pesar de que, segundo Nicolás, o goberno local asegura compartir a preocupación pola falta deste servizo.
O BNG puxo o foco na necesidade de reforzar a rede pública de coidados, tendo en conta a alta esperanza de vida en Galicia —86 anos para as mulleres e 81 para os homes—. “É unha marabilla vivir máis anos, pero hai que engadirlle vida e benestar a eses anos”, sinalou Nicolás, advertindo dos custos inasumibles das residencias privadas, que poden superar os 2.000 euros mensuais.
“O Concello de Miño tiña a oportunidade e a Xunta de Galicia, os medios para facer realidade esta residencia, pero semella que PP e PSOE prefiren ignorar as necesidades da nosa veciñanza e do resto da comarca”, concluíu o voceiro do BNG.